|
WARAYSI AF HAYEENKA URURKA AL ISLAAX DR.DUSUQI
Waraysiga waxa qaaday : khadar
Hussein
waxa shabakada Ogaalonline u suurto gashay in ay waraysi la yeelato
Dr.Ibraahin Dusuqi oo ah af hayeenka ururka Al Islaax, kana mid ah
dadka u ulaleeya nabadayta shacbiga dagaalku daashaday,isaga oo isla
markaasna ah dhakhyar wayn oo can ah wax qabadkiisa iyo u gargaarida
dadka tabaalaysana cid walabaa markhaati uga tahay.
hadaba waraysiga oo dhinacyo badan taabanaya, xaqiiqooyin qarsoona
shaaca ka qaadaya waxa uu u dhacay sida tan soo socota.
OGAALONLINE : Dr.Dusuqi
marka hore ku soo dhawow shabakada internetka ee Ogaalonline?
Dr.Dusuqi : Mahad and xad
lahayn Allah ayey u sugnaatay, kadib bogga internetka Ogaal Online waa
salaaman yahay, mahadna wey u dheertahay.
inta aanan waraysiga u galin waxa aan jeclaan lahaa
in aan ka hor mariyo horu dhacan kooban:
Xaaladda uu maanta marayo dalka Soomaaliya waa mid
halis ah, waa meel qorigu qooqan yahay, muruquna dooba dhabayo,
caqliga iyo mandiqana lagu jees-jeeso, waa meel uu ka hanaqaaday
mabda` guracan ee dhahaya “Kaan aniga ila jirin waa cadow”.
Jawi sidaasi u calawsan ayuu ururka Al-Islaax ka
shaqeeyaa, uus iyo dhiig dhexdoodana caano dhaay ah ka lisaa ama
malab, xabag barasha ah ka miiraa, umana aabayeelo, axna ma yiraahdo
markay haleesho micida shinidu, Illaa uu ka gun gaadhayo ujeedooyinkii
loo dhisay, ee ahaa dhisidda qofka Sommaliga iyo bulshada Soomaaliyeed
oo sumcad, sharaf iyo karaamo ku leh Beesha caalamka, kuna talaabsata
horumar dhinac walba ah, isla markaana Kitaabkeeda ku haysata gacanta
midig.
OGAALONLINE : marka hore waxaan jeclaan
lahayn Dr.ibraahin Dusuqi in akhristayaasha sharax gaaban ka siiso
waxa uu yahay dhaqdhaaqa islaamka soomayeed ee geeska afrika,
dadbadana u yaqanaan ISLAAX?
Dr.Dusuqi : su'aasha ku
saabsan Islaax maxay tahay? waxaa ka qaldan oo sixid mudan, Magaca oo
ah: Dhaqdhaqaaqa Islaamka Soomaaliyeed oo qura (Geeska Afrika)
waa khalad waana looma noqdaan.
Haddaan si kooban uga jawaabo su`aashan: Islaax waa
urur Soomaali ah, wadani ah, xerudhalan ah (Indigenous) Facweyn,
Baaxadweyn, oo ka howl gala Jamhuuriyadda Soomaaliya, Xubna ay ka
yihiin dad ka soo jeeda qeybaha bulshada Soomaaliyeed oo dhan, beel
Soomaaliyeed oo ka maqan majirto, boqolkiiba boqol waa aqoon yahanno,
rag iyo haween waa loo siman yahay, waa ururka abid Soomaali yeelato
ee ugu dhaqmid badan.
Mabda`a “Talo Wadaagga” waa urur dhowrkii sanaba
doorta madaxdiisa, doorashada ururkuna waa tan ugu hufan ee lagu
fikiri karo.
Ujeedooyinka loo dhisay ururka waa dhisidda qofka
Soomaaliga ah si loo gaadho bulsho Soomaaliyeed oo aqoon, ilbaxnimo,
horumar dhinac walba leh gaadhay, isla markaasna ku heysata
Kitaabkeeda Kariimka ah gacanta Midig.
Ugu dambeyntiina la helo dowlad hirgelisa hannaanka
loo yaqaano “Dowlad wanaagsan” ee ka kooban 8-da qodob.
OGAALONLINE : ma noo sheegi kartaa islaax
waxa ay shacbiga soomaliyeed ee dagaalku daashaday u qabatay mudadii
dagaalada sokeeyo hurayeen mudadaas oo ah intii ay si fiican saaxada
ugu soo muuqatay?
Dr.Dusuqi : Islaax waxay
bulshada Soomaaliyeed u tartay ma ogi cid abidkeed u tartay, xataa
dowladihii kala duwanaa ee Soomaaliya soo xukumay ma aysan gaadhin
heerka wax qabad ee Al-Islaax haddii laga fiiriyo dhinaca adeegyada
bulshada, maxaa yeelay maamuladu canshuur xoog leh ayey ka qaadi
jireen Bulshada, sidaa darteedna wax ka midah hantidoodii ayeey
maamuladoodu ugu adeegi jirtey bulshada.
Al-Islaax bulshada canshuur iyo qaadhaan toona kama
qaadin, isla markaa degmo kasta oo dalka ka mid ah Koonfur iyo Waqooyi
waxay ka haqabtirtay waxbarasho tayo badan, sidoo kale daryeel
caafimaad oo lacag la`aan ah sida ciribtirka Cudurka Qaaxada, waxay u
ololeeyaan mashruuc indho fiiqid ah oo kumanyaal indho la` bilaash
loogu fiiqayo, iyo gurmad deg-deg ah markii cudurada faa-faa ka
dilaacaan meel dalka ka mid ah.
Ururka Al-Islaax qeybihiisa kala duwan waxay
bulshada Soomaaliyeed u qodeen boqolaal ceel biyood si baahida biyood
wax looga qabto.
Sidoo kale boqolaal masaajid iyo Dugsiyo Quraan
ayaa loo dhisay bulshada Soomaaliyeed.
Kumanyaal agoon ah aya la kafaalo qaaday.
Dibu-heshiisiinta iyo daminta colaadaha waa
waxyaabaha bulshada Soomaaliyeed ku taqaano Al-Islaax.
Gurmad deg-deg ah ayaa lagu yaqaanaa Al-Islaax
markii abaar ama masiibooyin kale oo dabiici ah ku habsadaan qayb ka
mid ah bulshada Soomaliyeed, sida abaartii sanadkan ku dhufatay qaybo
badan oo ka mid ah Goboladda Koonfurta.
Ugu dambeyntii Al-Islaax waa codka u taagan soo
celinta Qarankii Soomaaliyeed.
OGAALONLINE : muxuu yahay mowqifka
ISLAAX ee
maxkamadaha islaamka? mase ka mid yihiin hogaamiyaasha
maxkamadahaas?
Dr.Dusuqi :Al-Islaax
malaha waxana kuma laha Maxaakiimta Islaamiga ah.
OGAALONLINE : waxa maalmahan qaar ka mid
ah warbaahinta
soomalidu farta ku fiiqeen in
ISLAAX dagaalka
daraf ka
tahay arintaas maxaad ka leedahay?
Dr.Dusuqi : Al-Islaax waa
urur nabadeed, mana hubeysna, si weyna waxay uga soo horjeedaa
Isdilka, Dirirta, Dulmiga, Soomaalida dhexdeeda ah, taariikhduna waxay
markhaati ka tahay aakhiro iyo adduunyo beel mooyee inaan wax kale
laga helayn dagaal sokeeye oo muslimiin u dhexeeya.
Sidaasi darted, ururka Al-Islaax weligii kama qeyb
qaadan, lugna kuma yeelan dirir u dhexeysa Soomaali dhexdeed, marka
wixii sidaas ka duwan waa been qaawan..
OGAALONLINE : hadaan u soo laabano
ISLAAX iyo
dowlada
ku meel gaarka ah maxay tahay calaaqada ka dhaxaysaa?,
taageero intee leeg ayayse
ISLAAX u haysaa dowlada ku
meel gaarka ah?
Dr.Dusuqi : Ururka
Al-Islaax wuxuu rumeysan yahay in lagama maarmaan tahay in Qarankii
Soomaaliyeed dib loo soo celiyo, wuxuuna ururku si aan kala hadhis
lahayn u taageerayaa Dowlad Soomaaliyeed oo dhalata, ilaalisana
Qaranimada Midnimada iyo sharafta dalka.
Marka isaga oo mabda`aas laga duulayo wuxuu Ururku
taageeray (T.F.G) welina waa taageersan yahay.
Laakiin taageerada ururku maahan tii
guulwadayaasha, balse wixii wanaag ahna waa ugu hambalyeynayaa, wixii
qaldanna waa uga nasiixeynayaa.
OGAALONLINE : maalmo dhawayd waxa shaaca
laga qaaday in
wafdii ISLAAX ka socda oo aad adigu ku jirto iyo
Madaxwaynaha Xukuumada ku meelgaarka ah baydhabo ku
yeesheen shir, shirkaas maxay ujeedadiisu ahayd?
maxaase ka soo baxay?
Dr.Dusuqi : Wey jirtaa in
wafdi Al-Islaax ah, Madaxweynaha Ra`iisalwasaaraha iyo Gudoomiyaha
Baarlamaanka si gooni gooni ah ay ugula shireen magaalada Baydhabo
horaantii bishii March, dowladu iyadaa na casuuntay kadib markii aan
dhambaal halbalyo ah u dirnay oon ugu hambalyeynay heshiiskii Cadan ee
keenay labadii garab ee dowladdu ukala jabtay dib isugu soo noqdaan.
Kulamadaasina waxay ku dhamaadeen is afgarad iyo
jawi wanaagsan iyo saaxiibtinimo.
OGAALONLIEN : Xilalka ka qaar ma loo
magacaabay Islaax sidii xukuumada tan ka horaysan ee carta lagu soo
dhisay?
Dr.Dusuqi : Wax xilal ah
ma anaan weydiisan dowladda, laakiin labada golaba waan ku jirnaa.
OGAALONLIEN : halkee ayuu ku danbeeyay
golihii dib u
hishiisiinta ee aad asaasteen ?
howshiise wali ma socotaa? wax qabadkiisa wax ma ku
xusi kartaa?
Dr.Dusuqi : Golaha
dibu-heshiisiinta Soomaaliyeed sidiisii ayuu u shaqeeyaa, maalin
walbana wuxuu u taagan yahay hadafkii loo sameeyey.
Meel kasta oo dab colaadeed ka taagan yahayna wuxu
u taagan yahay dhamaynta colaadaas, Banaadir iyo Hiiraan maanta waxaa
ka socda dadaalo howlwadeenada Goluhu ka wadaan si loo damiyo dabka
holcaya.
OGAALONLINE : ma aaminsan tihiin in
somaliya AL QACIDA
ku dhuumanayso?
Dr.Dusuqi : Ma hayno
macluumaad dhab ah oo lala shir tagi karo oo sugi kara ama beenin kara
arrintaa.
OGAALONLINE : dagaalka xamar ee
maatida aadka ugu
leedatay yay dani ugu jirtaa ayaad u malaynaysaa?
Dr.Dusuqi : Dagaalka ka
soconaya maalmahan Xamar Soomaali dan uma aha, waxaa kale oo filayaa
inuusan cidna dan u ahayn, maxaa jira cid ujeedo micno leh ka gaari
kartaa ma jirto. Waxa ku baaba`ayaana waa Bulshada reer Banaadir.
OGAALONLINE : isku dayn intee leeg
ayaad samayseen
dagaaladan hada sidii loo damin lahaa?
Dr.Dusuqi : Waxba
iskulama hadhin siddii loo damin lahaa mana ka daali doonno
InshaAllah.
Waraysiga waxa qaaday : khadar Hussein
|
